انصارپرس: په امریکا کې د سخت ژمني توپان له امله تر یو میلیون زیات کسان له برېښنا بې‌برخې شوي او له 10 زرو څخه ډېرې الوتنېلغوه شوې دي.

دې توپان ،درنو واورو او سختې یخنۍ د دې هېواد ختیځ او جنوبي ایالتونه فلج کړي دي.

د معلوماتو له مخې، د یکشنبې تر ماسپښین 2:16 بجو پورې، له یو میلیون څخه زیات امریکايي پیرېدونکي له برېښنا بې‌برخې وو.

تر ټولو ډېر زیانمن شوی ایالت ټېنېسي دی، چې شاوخوا 330 زره کسان پکې بې‌برېښنا پاتې شوي دي.

همداراز، په مسېسيپي او لوزیانا کې هر یو له 100 زرو زیات کسان له برېښنا محروم دي. نور اغېزمن شوي ایالتونه ټېکساس، کېنټکي، جورجیا، وېسټ ورجینیا او الاباما دي.

د الوتنو د څار وېب‌سایټ FlightAware ویلي چې د یکشنبې لپاره مهال‌وېشل شوې له 10 زرو او 800 څخه زیاتې الوتنېلغوه شوې دي. همداراز، د شنبې په ورځ تر 4 زرو زیاتې الوتنې هم لغوه شوې وې.

د امریکا د هوا پېژندنې ملي ادارې د وړاندوینې له مخې، د یکشنبې له ورځې تر دوشنبې سهاره پورې به د اوهایو له درې څخه تر شمال ختیځ پورې درنه واوره وریږي، او په نیو انګلېنډ کې به د واورې کچه تر 18 انچه پورې ورسېږي.