انصارپرس: (د لیندۍ 19 مه)، چین له پاکستان او افغانستان څخه وغوښتل چې په خپل منځ کې روان کړکېچ کم کړي او د ستونزو د حل لپاره خبرې اترې پیل کړي.

د چین د بهرنیو چارو وزارت ویاند ګو جایکون په بېجینګ کې په خبري کنفرانس کې وویل: «پاکستان او افغانستان د چین دودیز او دوست ګاونډیان دي. دواړه هېوادونه هم اوس او به تل د یو بل ګاونډیان وي.»

ګو جایکون زیاته کړه چې بېجینګ له دواړو هېوادونو غواړي چې خپل اختلافات او شخړې د خبرو او سلا مشورو له لارې حل کړي، ترینګلتیاوې راکمې کړي او د سیمې د سولې او ثباته په ګډ ساتنه وکړي.

د چین د بهرنیو چارو وزارت ویاند همداراز وویل چې چین چمتو دی له نړیوالې ټولنې سره په ګډه د پاکستان او افغانستان د اړیکو د ښه کېدو لپاره رغونده رول ولوبوي.