انصارپرس: (د لیندۍ 13مه)، د امریکا کورني امنیت وزارت ویلي، چې په واشنګټن کې یې د جان شاه ساپي په نوم یو افغان د داعش خراسان څانګې د ملاتړ او ورسره د اړیکو په تور نیولی دی.
د امریکا د کډوالۍ ادارې د معلوماتو له مخې، دغه افغان د جوبایډن د دورې پر مهال د امریکايي متحدینو د تخلیې پروګرام کې له افغانستانه ایستل شوی دی.
یادې ادارې ادعا کړې، چې هغه د داعش خراسان څانګې د ملاتړ په تور څارل کېده او همدارنګه په افغانستان کې یې خپل پلار ته، چې د یوې وسله والې ډلې قوماندان دی، وسلې او تجهیزات برابرول.
په تېرو اونیو کې دا د افغانانو پر وړاندې په امریکا کې لږ تر لږه څلورمه لویه قضیه ده چې پېښېږي.
تر اوسه د یادو افغانانو، چې د امنیتي ځواکونو د بریدونو، ګواښونو، داعش سره په اړیکو او نورو تورونو تورن دي، د محاکمې په اړه وروستۍ پرېکړه نه ده شوې.
