انصارپرس: (د لړم 27مه)، د ایران د بهرنیو چارو وزیر عباس عراقچي او د طالبانو د حکومت د بهرنیو چارو وزیر مولوي امیر خان متقي د دوشنبې په ورځ د دوو هېوادونو د اړیکو د وروستیو پرمختګونو په اړه ټېلفوني خبرې وکړې.

د مهر خبري اژانس د راپور له مخې، عراقچي او متقي د دوه‌اړخیزې همکارۍ د وضعیت او همداراز د پاکستان او افغانستان د وروستیو دوه اړخیزو تعاملاتو په اړه نظرونه تبادله کړل.

د ایران د بهرنیو چارو وزیر په خپلو څرګندونو کې د سیمې د هېوادونو ترمنځ د سولې او ثبات د ټینګښت اړتیا ته اشاره وکړه او ټینګار یې وکړ چې د سیمه‌ییزو هېوادونو ترمنځ د ګډې همکارۍ په چوکاټ کې باید مشورې او همغږي نوره هم پیاوړې شي.

د طالبانو د بهرنیو چارو وزیر مولوي امیر خان متقي د سیمې د هېوادونو له لوري د مشورو او همغږۍ هرکلی وکړ او د ترسره شویو دیپلوماتیکو هڅو یې مننه وکړه.

ښاغلیو متقي او عراقچي وروسته له دې دا ټېلفوني خبرې وکړې چې ایران د افغانستان او پاکستان ترمنځ د وروستي کړکېچ په جل کې د مرستې لپاره د منځګړتوب وړاندیز وکړ چې پاکستان یې هرکلی وکړ.

دغه خبري اژانس د ښاغلیو متقي او عراقچي په خبرو کې د افغانستان او پاکستان د وروستي کړکېچ یادونه نه ده کړې. او دا یې هم نه دي ویلي چې متقي که عراقچي مقابل لوري ته ټېلفون کړی و.