انصار: (د وږی ۸ مه)، د ۲۰۲۱ م کال د اګست په دې ورځ (۳۰) د امریکا وروستی پوځي له افغانستان څخه په داسي حال کې ووت چې د امریکا د ځواکونو د ایستلو پر څرنګوالي لا هم ډېرې نیوکې کېږي او ځینې امریکایان یې شرموونکي بولي.

جنرال کریستوفر دوناهو د ۲۰۲۱ کال په اګست کې وروستی امریکايي پوځي و چې، الوتکې ته وخوت او په ‌‌‌دې ترتیب په افغانستان کې د نړیوالو ځواکونو څه باندې شل کلن حضور رسماً پای ته ورسېد.

له افغانستانه د وروستي امریکايي پوځي له وتلو وروسته د امریکا د هماغه وخت ولسمشر جو بایډن په یوه اعلامیه کې د امریکا د تاریخ د تر ټولو اوږدې جګړې د پای اعلان وکړ.

د امریکایي چارواکو له دې اعلان څو شېبې وړاندې په کابل ښار کې هوایي ډزې پیل شوې او طالبانو د خپلې بریا او خپلواکۍ اعلان وکړ.

طالب ویاند ذبیح الله مجاهد پر خپله ټوېټرپاڼه ولیکل«وروستي پوځیان د شپې پر دوولس بجو (د اګست دېرشمې او یو دېرشمې ترمنځ شپه) له افغانستان ووتل او په دې توګه افغانستان په بشپړه توګه ازاد او خپلواک شو.»

د امریکا د هغه مهال ولسمشر جو بایډن د هغو امریکایي پوځیانو او افسرانو مننه وکړه، چې په وروستیو دوو اوونیو کې یې له افغانستان د لسګونو زرو کسانو په ایستلو کې مرسته وکړه.

د امریکايي ځواکونو د بشپړه وتلو په درشل کې امریکا او متحدانو یې زرګونه افغانان، چې ډېری یې د جمهوري حکومت پلویان او کارکوونکي وو، له افغانستانه په الوتکو کې وایستل.

جوبایدن وړاندیز کړی و چې جنرال دوناهو دې ستر جنرالۍ ته ترفیع وکړي او په اروپا او ختیځه افریقا کې دې د امریکا د پوځ قومانده په لاس کې واخلي.

خو د امریکا د سنا جرګې جمهوریپالو غړیو د پوځ د بریدجنرال کریسټوفر دوناهو د ترفیع مخه ونیوله.

د امریکا ولسمشر ډونالډ ټرمپ او متحدانو یې په ځلونو له افغانستانه د امریکا د پوځ د وتلو په پروسې کلکې نیوکې کړي او ژمنه یې کړې چې د دې پېښې عاملان به تعقیب او منفک کړي.

امریکا د ۲۰۰۱ کال د سپټمبر د ۱۱ مې له پېښې وروسته د القاعده شبکې د ځپلو او د دې شبکې د ملاتړ په خاطر طالبانو ته د سزا ورکولو لپاره د نړیوالو ځواکونو په مشرۍ په افغانستان یرغل وکړ. امریکا او متحدانو یې په افغانستان کې شل کاله تېر کړل خو نه یوازې دا چې طالبان یې ونه ځپلی شول بلکې د وخت په تېرېدو جګړه لا تېزه شوه. مګر د القاعده مشر اسامه بن لادن یې په پاکستان کې وواژه.

په دې جګړه کې نژدې دوه نیم زره امریکايي پوځیان ووژل شول او شاوخوا ۲۰ زره نور ټپیان شول.

افغانستان ته د امریکايي پوځیانو له راتګ سره که څه هم ډېرې وینې وبهېدې خو افغانستان ته ډېرې پیسې هم راغلې. سره له دې چې له افغانستان سره د امریکا او نورې نړۍ مرستې تر ډېره ضایع او حیف و میل شوې خو بیا هم ډېر کارونه پرې وشول. زرګونه ښوونځي، کلینکونه، روغتونونه، دولتي ادارې او زرګونه کیلومتره پاخه سړکونه او بې شمېره پُلونه او پلچکونه جوړ شول.