انصار: (د زمري ۱۱مه)، د پاکستاني رسنيو د راپورونو له مخې، ټاکل شوې د طالبانو بهرنيو چارو وزير امير خان متقي په مشرۍ د طالبانو يو پلاوی د دوشنبې په ورځ اسلام اباد ته روان شي.

په دې درې ورځني «دوشنبه، سه شنبه او چهارشنبه» سفر کې به امير خان متقي د پاکستان د پوځ له مشر فيلډ مارشال جنرال عاصم منير، بهرنيو چارو وزير او د پاکستان لومړي وزير سره هم وګوري.

دغه سفر د طالبانو او پاکستان د اړيکو پياوړتيا او د ځينو اختلافي مسايلو د حل په موخه بلل کېږي.

پاکستاني رسنيو د خپلو منابعو له قوله د دغه سفر د اجندا ځينې برخې رسنيزې کړې دي: «پر ډيورنډ کرښه د امنيتي مسايلو مديريت او پر يو پټ تفاهم لا زيات بحث، ټي ټي پي، د اقتصادي راکړې ورکړې کچې زياتوالی او د شته موانعو له منځه وړل او افغان کډوال.»