انصار:( د چنګاښ ۲۶مه)، د سوریې د انتقالي حکومت مشر احمد الشرع په تازه څرګندونو کې ویلي، چې له اسراییل سره د جګړې کولو نه وېرېږي؛ خو د سوریې د ولس ګټې او سولې خوندیتوب غوره ګڼي.

نوموړي ټینګار وکړ، چې د جګړې او داخلي اصلاحاتو ترمنځ یې د نورو ویجاړیو د مخنیوي لپاره د اصلاحاتو لاره غوره کړې ده.

بل لورته د ملګرو ملتونو سرمنشي انتونیو ګوترېش پر خپله اېکس پاڼه په سوریه کې د تاوتریخوالي پر پراخېدو اندېښنه ښودلې.

ګوترېش زیاته کړ، چې د ملکیانو پر وړاندې هر ډول تاوتریخوالی په کلکو ټکو غندي.

نوموړي لیکلي: «زه د سوریې د ځمکنۍ بشپړتیا او حاکمیت څخه د سرغړونې د سملاسي درېدو غوښتونکی یم.»

پرون ‏اسراییلي پوځ د سوریې پلازمېنه دمشق کې د دفاع وزارت او ولسمشرۍ ماڼۍ ته نږدې هوایي بریدونه وکړل.

نړیوالو رسنیو راپور ورکړی وو، چې د دغو بریدونو له امله لږ تر لږه یو کس وژل شوی او ۱۸ نور ټپیان دي.

دغه بریدونه وروسته له هغې شوي چې اسراییل ګواښ وکړ که د سوریې دولتي ځواکونه د هېواد له سویلي برخې ونه ووځي، خپل بریدونه به پراخ کړي.