انصار: (د چنګاښ ۲۴مه)، د امریکا ولسمشر دونالد ټرمپ، خبرداری ورکړ چې که کرملین د ۵۰ ورځو په موده کې له اوکراین سره د اوربند توافق ته ونه رسېږي، نو امریکا به پر هغو هېوادونو سختې ګمرکي تعرفې ولګوي چې له روسیې سره سوداګري کوي.

ټرمپ دا څرګندونې د ناټو له سرمنشي مارک روټې سره په سپینه ماڼۍ کې د کتنې په ترڅ کې وکړې، او ویې ویل: « که تر ۵۰ ورځو پورې کومه موافقه لاسلیک نه شي، نو ډېرې سختې تعرفې به عملي کړو. زه له سوداګرۍ څخه د ډېرو چارو لپاره استفاده کوم، خو د جګړو د پای ته رسولو لپاره یې کارول بې‌ساری اغېزمن دی.»

همداراز، ټرمپ ژمنه وکړه چې میلیاردونه ډالره وسلې به کییف ته وسپاري. هغه وویل، د ناټو غړي هېوادونه به د امریکا جوړې وسلې، لکه د پاتریوټ هوايي دفاعي سیستمونه، وپېري او بیا به یې اوکراین ته وسپاري.

«موږ به پاتریوټ ورکړو، ځکه دوی ورته واقعاً اړتیا لري. پوتین ډېر خلک حیران کړل. ښه خبرې کوي، خو د شپې ناوخته بمباري کوي.»

د ټرمپ دا څرګندونې په دریځ کې د روسیې په وړاندې د یوه ښکاره بدلون نښه ده. هغه چې مخکې یې ادعا کوله چې له پوتین سره شخصي اړیکې لري او د سولې توافق کولی شي، خو اوس په ښکاره ډول کرملین تورنوي چې د جګړې د پای ته رسولو په خبرو کې جدي نه دی.

ټرمپ د پوتین خبرو ته په اشارې وویل: « یوازې خبرې دي، خو وروسته یې توغندي کییف وهي او ۶۰ کسان وژل کېږي. دا باید ودرول شي.»

له دې وړاندې، د ټرمپ نژدې متحد، سناتور لیندسي ګراهام، ویلي و چې د اوکراین جګړه یوې حساسې مرحلې ته رسېدلې او ټرمپ خپل ملاتړ له کییف سره یو ځل بیا څرګند کړی دی. هغه زیاته کړه:

«په راتلونکو ورځو کې به اوکراین ته خورا ډېرې وسلې ولیږل شي. د پوتین تر ټولو ستره تېروتنه دا وه چې هڅه یې وکړه ټرمپ تېر باسي. انتظار اوسئ؛ په نژدې ورځو او اوونیو کې به د خبرو مېز ته د پوتین د راوستلو لپاره ستر حرکت پیل شي.»