انصار: (د چنګاښ ۱۴مه)، قطر کې د طالبانو سفیر سهیل شاهین وایي، ښایي راتلونکو اوونیو یا میاشتو کې ځینې نور هېوادونه هم د روسیې د پرېکړې په تعقیب، د طالبانو حکومت په رسمیت وپېژني.

نوموړي له یوې روسي رسنۍ سره خبرو کې زیاته کړې: ښایي په راتلونکو اوونیو یا میاشتو کې ښه خبرونه واورو.

د طالبانو د بهرنیو چارو وزارت تېره شپه وویل، چې روسیې د دوی حکومت په رسمیت وپېژنده.

روسیې هممهاله د طالبانو په رسمیت پېژندنه تایید کړه.

روسي رسنیو د دغه هېواد د بهرنیو چارو وزارت په حواله راپور ورکړ، چې افغانستان کې د طالبانو سرپرست حکومت یې په رسمیت وپېژنده او د افغانستان له لوري ور معرفي شوی سپين بيرغ يې هم منلی دی.

روسیه لومړنی هېواد شو چې طالبان په رسمیت پېژني.

تازه ‏د روسیې بهرنیو چارو وزارت یوه بیان کې لیکلي چې د طالبانو په رسمیت پېژندنه به د دواړو هېوادونو دوه اړخیزې اړیکې او همکارۍ پراخې او پياوړې کړي.

بیان کې راغلي چې له طالبانو سره به د سیمه ییز امنیت په پیاوړتیا، د ترهګرۍ او نشه يي توکو پر وړاندې مبارزې، مرستو، زېربنايي پروژو، د انرژۍ تولید، اقتصادي او دغه راز سوداګریزې ودې برخو کې خپلو هڅو ته دوام ورکړي.