انصار: (غبرګولی۳۱مه)،  فاکس نيوز امريکايي رسنۍ خبر ورکړی، چې د پاکستان - هند تر منځ د جګړې پای ته رسولو او اوربند ټينګولو له امله، پاکستان رسماً د امريکا ولسمشر ډونالډ ټرمپ د ۲۰۲۶ کال د سولې نوبل جایزې ته نوماند کړی دی.

يادې رسنۍ ليکلي، ټرمپ ته دغه امتياز د دواړو هېوادونو تر منځ د جوړجاړي رامنځته کولو لپاره د هغه د قاطع ډيپلوماتيکې مداخلې او ارزښتناکې مشرۍ په وياړ ورکړل شوی دی.

پاکستان ويلي: «د سيمه ييزې جګړې د مخنيوي مهار لپاره د ټرمپ رول مهم او پام وړ و.»

تازه ټرمپ د پاکستان د پوځ مشر جنرال عاصم منير واشنګټن ته بللی و او د بندو دروازو تر شا يې په سيمه کې د نوي ماموریت په اړه ورسره خبرې کړې دي.

داسې معلومات هم خپاره شوي، چې هغه سپینې ماڼۍ ته په سيمه کې د ترهګرۍ ضد جګړې قرارداد او د افغانستان د معدنياتو پر سر د معاملې وړانديزونه هم له ځان سره وړي وو.

د سولې نوبل جایزه هر کال هغو کسانو ته ورکول کېږي، چې د نړۍ د سولې او ارامۍ لپاره يې ملموسې هڅې کړې وي.