انصار: (د غبرګولي ۱۸ مه)، د یوې بریتانیايي ورځپاڼې د راپور له مخې، طالبان د افغانستان په لوګر ولایت کې د بریتانیا د ځانګړو ځواکونو له یوه پخواني مرکز څخه د ځانمرګي بې پېلوټه الوتکې یا ډرون د ازموینې او پراختیا لپاره کار اخلي.

«ډیلي مېل» ورځپاڼې د استخباراتي سرچینو په حواله راپور ورکړی چې دغه مرکز چې په افغانستان کې د بریتانیايي ځواکونو د شتون په مهال د ځانګړو د عملیاتو لپاره کار اخیستل کېده، اوس د طالبانو د ځانمرګي ډرون د ازموینې پر اصلي مرکز بدل شوی دی.

سرچینې وایي چې له دغه مرکز څخه څو ازمیښتي الوتنې شوې دي او ځینې ډرونونه د دیورند کرښې په اوږدو کې په بریدونو کې هم کارېدلي دي. د سرچینو پر اساس، طالبانو د القاعده د انجنیرانو او هغو کسانو په مرسته چې په لوېدیځو هېوادونو کې یې زده کړې کړې دي، لسګونه بې پېلوټه الوتکې جوړې کړي او پراختیا ورکړې ده.

راپورونه ښيي چې طالبان اوس د پرمختللو ډرونونو لکه د امریکا د  MQ-9 Reaper او د ایران د شاهد ۱۳۶ په څېر کاپي جوړوي.

د ډرونونو د باډۍ جوړښت او وروستی امونتاژ زیاتره د امریکا د پخواني کمپ «فونیکس» په شاوخوا کې ترسره کېږي. دغه کمپ تر ۲۰۲۱ مخکې د افغان پوځ له مهمو لوژستیکي او روزنیزو مرکزونو څخه و، خو اوس په یوه پټ صنعتي مرکز بدل شوی چې د طالبانو لپاره ډرونونه جوړوي.

په افشا شویو معلوماتو کې راغلي چې د چین، ترکیې، روسیې، بیلاروس او حتی بنګله‌دېش انجنیران له طالبانو سره په دې پروژه کې مرسته کوي او ځینې پرزې هم له دغو هېوادونو واردېږي.

د مېل ورځپاڼې له مخې، د طالبانو د پوځ له لوري په ډرون ټکنالوژۍ کې پرمختګ د سیمې ځینو هېوادونو او د لوېدیځ استخباراتي ادارو ته سترې امنیتي اندېښنې پیدا کړي دي، ځکه چې طالبان اوس د دودیزو وسلو پر ځای، د ځیرکو سیستمونو او لرویشتونکو وسلو پراختیا ته مخه کړې ده.