انصار (د غويي ۲۲ مه)، آلماني رسنیو خبر ورکړی چې د «فردریش مرتس» په مشرۍ د دغه هېواد نوي حکومت د کډوالۍ اړوند سختو پالیسیو د پلې‌کولو لپاره په خپل لومړي اقدام کې د لوګزامبورګ په پوله کې څلور افغان پناه‌غوښتونکي پېژندلي او بېرته یې ګرځولي دي.

د دویچه وېله په راپور کې ویل شوي چې څلور هغه افغانان پېژندل شوي او بېرته راګرځول شوي چې مخکې یې په یونان کې د پناه غوښتنه کړې وه.

تر اوسه د دغو څلورو پناه‌غوښتونکو هویت نه دی په ډاګه شوی. ویل کېږي چې دوی بېرته یونان ته لېږل شوي دي.

رسنیو د آلماني چارواکو په حواله راپور ورکړی چې دا اقدام د نوي حکومت د پراخې ستراتیژۍ یوه برخه ده چې د جرمني د پناه‌غوښتنې پر سیسټم شته فشار کم کړي.

جرمني د ۲٫۵ میلیون کډوالو په لرلو په نړۍ کې د کډوالو لپاره درېیم لوی کوربه هیواد بلل شوی. دغه هېواد په وروستیو کلونو کې ‘د ټولنیزو زیربناوو فشار او د خلکو د نارضایتۍ د زیاتوالي په ګډون له ګڼو ننګونو سره مخ شوی‎ دی. 

په آلمان کې د کډوالو پر وړاندې سخت چلند هلته له څو وروستیو خونړیو بریدونو وروسته پیل شوی. د یاد هېواد د کورنیو چارو وزیر «الکساندر دوبریند» ټینګار کړی چې حکومت به د سرحدي پولیسو په زیاتولو او د ځمکنیو پولو په څارنې سره د غیرقانوني کډوالو د ننوتلو مخه ونیسي.