انصار: (د غويي ۷ مه) د افغانستان د سولې لپاره د امریکا پخواني استازي زلمي خلیلزاد، د پاکستان د دفاع وزیر د وروستیو څرګندونو په غبرګون کې ویلي چې اسلام‌آباد لا هم د افراطي او تروریستي ډلو ملاتړ ته دوام ورکوي.

خلیلزاد پر ایکس پاڼه (پخواني ټویټر) ولیکل، معتبر راپورونه شته چې ښيي د مارچ میاشتې په منځ کې د بلوچ جنګیالیو له خوا د بلوچستان په مستونګ سیمه کې د داعش پر یوه روزنیز مرکز برید شوی او شاوخوا ۳۰ غړي یې، چې پکې د هند، تاجکستان، ترکیې او ازبکستان وګړي شامل وو، وژل شوي دي.

نوموړي زیاته کړه: « که چېرې پاکستان واقعاً د ترهګرۍ پر ضد جدي وي، سخته ده چې داسې مرکزونه دې د آی.ایس.آی (د پاکستان استخباراتي اداره) له سترګو پټ پاتې شوي وي.»

خلیلزاد پوښتنه کړې: «ایا پاکستان نور د ترهګریزو او افراطي ډلو پناه ځای نه دی؟» هغه ټینګار وکړ چې لا هم معتبر راپورونه د خطرناکو ترهګریزو ډلو د شتون خبر ورکوي.

د خلیلزاد په وینا، «اسلام‌آباد باید په خپله خاوره کې د داعش او نورو تروریستي ډلو شتون چې د پاکستان، سیمې او نړیوالې ټولنې لپاره جدي ګواښ دي، په جدي توګه تعقیب کړي.»

خلیلزاد خبرداری ورکړی چې له ترهګرۍ څخه د تاکتیکي اهدافو لپاره د حربې په توګه کار اخیستل، یوه تراژیکه تګلاره ده چې په پای کې به یې د همدې کار کوونکو په زیان تمام شي.

خلیلزاد دې ته هم اشاره کړې چې امکان لري له پاکستان څخه د ستنېدونکو افغانانو په منځ کې د داعش نفوذي کسان شامل وي.

د طالبانو چارواکو څو ځل ویلي دي چې د داعش پناه ځایونه د پاکستان په خاوره، په ځانګړي ډول په بلوچستان ایالت کې دي.