د هند د بهرنیو چارو وزیر «سوبرمنیم جي‌شنکر» د ګجرات ایالت په یو پوهنتون کې د وینا پرمهال د پاکستان د «ترهګرۍ پالنې» پر پالیسیو توندې نیوکې کړې او ویلي یې دي چې اسلام آباد دا ځل د ترهګرۍ په هغه جال کې راګیر شوی چې په نورو هیوادونو کې یې د بې‌ثباتۍ د رامنځته‌کولو لپاره غوړولی و.

جي‌شنکر د ترهګرۍ د ملاتړ په برخه کې د پاکستان «خطرناک رول» ته په اشارې دا چلند د پاکستان د پرمختګ پر وړاندې ستر خنډ بللی او د پاکستاني حکومت دا پالیسي یې د هندي حکومت له پالیسیو سره په ټکر کې بللې ده.

د هند د بهرنیو چارو د وزیر دا توندې نیوکې په هندي رسنیو کې په پراخه کچه خپرې شوې دي.

د هند د بهرنیو چارو وزیر دا هم ویلي چې نوي ډیلی په اقتصادي او تخنیکي لحاظ یو ښه مستحق نړیوال مقام ترلاسه کړی، خو پاکستان لا هم له ورته «زوړ سناریو» څخه کار اخلي. د هغه په ​​وینا: نن ورځ زموږ برانډ ټیکنالوژي ده، خو د دوی (پاکستان) برانډ ترهګري ده. که ترهګري رامنځته شي، موږ به ځواب ورکړو، خو ولې باید خپل قیمتي وخت پرې ضایع کړو؟

د NDTV په راپور کې د جي‌شنکر په حواله ویل شوي چې په افغانستان کې د دوه‌ګوني لوبې په کولو سره، په ورته وخت کې د طالبانو ملاتړ او د هغوی له مخالفینو سره د همکارۍ له لارې، پاکستان ځان په هغه ترهګرۍ کې ګیر کړی چې له کلونو راهیسې یې پالنه کړې وه.

د هند د بهرنیو چارو وزیر د پاکستان پر «خطرناکې ماضي» نیوکه کړې او ویلي یې دي چې دغه هېواد د خپلو ویجاړونکو پالیسیو په پریښودو کې پاتې راغلی. هند بدل شوی. کاش موږ ویلای شوای چې پاکستان هم بدل شوی دی، خو له بده مرغه دوی په ډېرو اړخونو کې خپل بد عادتونه لري.

د ویلو ده چې هند تر دې مخکې هم بار بار پاکستان د «ترهګرۍ تمویلوونکی» هېواد بللی او د دوی پر پالیسۍ یې توندې نیوکې کړې دي.