انصار: ( د کب ۲۸مه)، په ملګرو ملتونو کې د چین استازی فو کونګ وايي چې افغانستان دا مهال په یو حیاتي پړاو کې دی او نړیواله ټولنې دې سملاسي د دغه هېواد د ودې، نشهيي توکو د کنټرول او ترهګرۍ سره د مبارزې لپاره ډېر لګښتونه برابر کړي.
کونګ د ملګرو ملتونو د امنیت شورا په ناسته کې ویلي چې د افغانستان د بیارغونې، بانکي او مالي سیسټم پیاوړتیا او بشردوستانه ننګونو د له منځه وړلو لپاره لا ډېرې مرستې اړینې دي.
نوموړي د افغانستان لپاره د یوناما ماموریت غځولو ته په اشارې زیاته کړې چې دا له دغه هېواده د ملګرو ملتونو د قوي ملاتړ ښودنه کوي.
هغه په راتلونکې کې د مثبتو او پام وړ پایلو ترلاسي لپاره له طالبانو سره تعامل «اړین» بللی دی.
فو کونګ دا څرګندونې داسې مهال کړي چې بیجینګ له تېرو درېیو کالو راهیسې له طالبانو حکومت سره نږدې اړیکې پالي.
د یادونې ده چې په دې ناسته کې په افغانستان کې د ملګرو ملتونو مرستندویه دفتر ماموریت د یو بل کال لپاره وغځول شو.
