انصار: ( د کب ۱۱ مه)، د اوکراین له ولسمشر ولودیمیر زیلینسکي سره د امریکا د ولسمشر ډونالډ ټرمپ او د هغه د مرستیال جی‌دي ونس له بې‌ساري شخړې وروسته، اروپایي مشرانو د واشنګټن په وړاندې د اوکراین کلک ملاتړ وکړ.

د اروپایي کمېسیون مشرې اورزولا فن در لاین، زیلینسکي ته په ایکس (پخواني ټویټر) کې لیکلي:

«ستا شرافت، د اوکرایني ولس زړورتیا ته درناوی کوي.»

هغې زیاته کړه:«پیاوړی، زړور، او بې‌باک اوسه.»

همداراز یې ټینګار وکړ:«تاسو هیڅکله یوازې نه یاست. موږ به ستاسو ترڅنګ د عادلانه او تینګې سولې لپاره کار ته دوام ورکړو.»

د فرانسې ولسمشر امانوئل مکرون، له ډونالډ ټرمپ سره د زیلینسکي له جنجالي کتنې وروسته، د اوکراین ولسمشر ته ټېلفون وکړ.

د جرمني د مسیحي دموکرات ګوند مشر او راتلونکي احتمالي صدراعظم فریدریش مِرڅ، وویل چې جرمني به د اوکراین ترڅنګ پاتې شي، که حالات ښه وي او که سخت.

هغه ټینګار وکړ:«په دې وحشتناکه جګړه کې، هیڅکله باید یرغلګر او قرباني سره پرتله نه کړو.»

د اروپایي اتحادیې د بهرني سیاست مسوولې کایا کالاس،  اعلان وکړ: «اوس وخت رارسېدلی چې آزادې نړۍ ته یو نوی مشر پیدا شي.»

هغې زیاته کړه:«نن ورځ معلومه شوه چې ازاده نړۍ نوي مشرتابه ته اړتیا لري.»

کالاس وویل چې دا مسوولیت اوس د اروپایي هېوادونو پر غاړه دی، او ټینګار یې وکړ:

«دا موږ، اروپایان یو، چې باید دا چلنج ومنو.»

دا څرګندونې په داسې حال کې شوي، چې د اروپا او امریکا اړیکې د واشنګټن د نوو سیاستونو له امله له ستونزو سره مخ دي.

په همدې حال کې، د بریتانیا صدراعظم کی‌یر سټارمر سبا (د یکشنبې په ورځ) د اروپایي مشرانو د یوې غونډې کوربه‌توب کوي.

په دې غونډه کې د فرانسې ولسمشر امانویل مکرون او د اوکراین ولسمشر ولودیمیر زیلینسکي هم ګډون لري.

دا غونډه په داسې حال کې ترسره کېږي، چې اروپایي هېوادونه غواړي په نړیوال سیاست کې خپل رول لا پیاوړی کړي.