انصار:( د تله ۸مه)، د اسراییل له خوا د لبنان د حزب الله ډلې د مشر حسن نصرالله وژلو غبرګونونه راپارولي دي.

حسن نصرالله چې د لبنان د حزب الله ډلې مشري کوله ووژل شو، هغه څه چې پراخ عکس العملونه یې پارولي دي.

حزب الله چې یوه وسله واله ډله او سیاسي ګوند دی، د لبنان د جنوب پر زیاتو برخو کنټرول لري او د امریکا د متحدو ایالاتو له خوا د یوه تروریستي سازمان په توګه پېژندل کېږي.

اروپايي اتحادیې د لبنان د حزب الله پوځي څانګه نه، بلکې سیاسي ګوند په تور لېست کې شامل کړی دی.

حزب الله چې د ایران متحده ډله ده، د شنبې په ورځ سپتمبر ۲۸ په یوه بیان کې تایید کړه چې حسن نصرالله د اسراییل په یوه هوايي برید کې وژل شوی او ژمنه یې کړې چې د دغې ډلې د مشر له وژل کېدو سره سره به د اسراییل پر ضد خپلې مبارزې ته دوام ورکوي.

د اسراییل پوځ هم پرون شنبه ویلي چې حسن نصرالله د جمعې په ورځ د لبنان په پلازمېنه بیروت کې په یو لړ هوايي بریدونو کې وژل شوی دی.

د حسن نصرالله وژل کېدو د نړۍ په زیاتو برخو کې غبرګونونه راپارولي دي.

په ملګرو ملتونو کې د امریکا پخواني استازي او په عراق او افغانستان کې د امریکا پخواني سفیر زلمي خلیلزاد د حسن نصراله وژنه او د حزب الله کمزوري کېدل د ایران لپاره یوه لویه ضربه بللې ده.

خلیلزاد دا پوښتنه مطرح کوي چې اسراییل له ځانه د انفرادي مشرانو د موندلو او وژلو وړتیا ښودلې، خو اوس ایران به څه وکړي او د ایرانیانو چلند به بدل شي؟

د ایران د بهرنیو چارو وزارت ویلي، د اسراییل په هوايي برید کې د حزب الله د مشر حسن نصرالله له وژل کېدو سره-سره به هم د هغه لاره روانه وي.

د فرانسې خبري اژانس د راپور له مخې، د ایران د بهرنیو چارو وزارت ویاند ناصر کنعاني په ټولنیزه شبکه ایکس یا پخواني ټویټر کې د دې پېښې په اړه د خواشینۍ ښوولو سره لیکلي: د مقاومت د مشر حسن نصرالله عالي لاره به دوام ومومي او د هغه سپېڅلی هدف، یعنې د بیت المقدس ازادي به په واقعیت بدله شي.

په همدې حال کې د ایران تسنیم خبري اژانس ویلي، د ایران هوايي شرکت ایران اییر بیروت ته ټولې الوتنې تر بلې خبرتیا پورې ځنډولې دي.

د رویټرز خبري اژانس د راپور له مخې، د ترکیې ولسمشر رجب طیب اردوغان په لبنان کې د اسراییل وروستي بریدونه د اسراییل د نسل وژنې، اشغال او تېري د پالیسۍ د برخې په توګه غندلي، د ملګرو ملتونو له امنیت شورا او نورو بنسټونو یې غوښتنه کړې چې د اسراییل مخه ونیسي.

فلسطینۍ ډلې حماس چې د امریکا متحده ایالاتو او اروپايي ټولنې له خوا د تروریستي سازمان په توګه پېژندل کېږي، هم د حزب الله د مشر حسن نصرالله پر مړینه خواشیني څرګنده کړې او اسراییل یې د هغه څه مسوول وباله چې دغې ډلې یو ناوړه جنایت او خطرناکې پایلې یې بللي او ویلي یې دي د سیمې پر ثبات به اغېز کوي.

د رویټرز خبري اژانس د راپور له مخې، په یمن کې د ایران له ملاتړه د برخمنو حوثي یاغیانو غورځنګ هم په یوه بیان کې د حسن نصرالله پر وژل کېدو خواشیني څرګنده کړه او ویې ویل چې د هغه وژنه به په لبنان کې جهادي روحیه لا پیاوړې کړي.