انصار: (د وږی ۲۲مه)، د بریتانیا ګارډین ورځپاڼې او د یوشمېر اسټرالیایي رسنیو لیکلي ، چې له افغانستان تللي په جنایي جرمونو د تورنو اسټرالیایي افسرانو په اړه د یاد هېواد حکومت پرېکړه کړې چې رتبې او مډالونه به یې لغوه کړي.

د اسټرالیا دغه پخواني افسران، چې شمېر  له ۱۵ کم ښودل کېږي ، تورن شوي چې په افغانستان کې یې تر قوماندې لاندې کسانو جنګي جنایتونه ترسره کړي دي.

رسنۍ وایي د اسټرالیا د دفاع وزیر ریچارد مارلیس دا پرېکړه  نن پنجشنبه خپل پارلمان ته د معلوماتو ورکړې پرمهال څرګنده کړه.

د جمهوریت پرمهال اسټرالیا د نړیوال ایتلاف په چوکاټ کې افغانستان ته خپل شاوخوا ۱۵۰۰ سرتېري استولي وو چې تر ډېره په ارزګان ولایت کې اوسېدل.

دفاع وزیر د یاد افسرانو شمېره له ۱۵ کمه ښودلې خو نومونه یې نه دي په ډاګه کړي.

د رسنیو د معلوماتو له مخې په اسټرالیا کې یوه څېړنه چې په څلورو کلونو کې بشپړه شوې، ښيي چې افغانستان کې د اسټرالیا ۲۵ پخوانیو او برحاله ځانګړو ځواکونو، د ادعا له مخې ۳۹ افغانان په ناقانونه توګه وژلي دي.