انصار: ( د غبرګولی۳۱مه)، د طالبانو ویاند وايي چې د ریچارډ بینیټ راپور د دوحې د دریمې غونډې په څنډه کې د ذهنونو د خرابولو هڅه ده.

د طالبانو ویاند ذبیح الله مجاهد په خپله اېکس پاڼه لیکلي چې د ملګرو ملتونو د ځینو غړو په ځانګړې توګه د ریچارډ بینیټ راپور د راتلونکې دوحې غونډې په مناسبت د ذهنونو د خرابولو هڅه ده.

 طالبانو ویلي، چې له بده مرغه په ​​ملګرو ملتونو کې ځینې مغرض کسان تل هڅه کوي چې د افغانستان ناسم انځور وړاندې کړي او د څو محدودو مسایلو تر سیوري لاندې لوی پرمختګونه تر پښو لاندې کړي.

د طالبانو ویاند وايي، د دوی حکومت  په ملګرو ملتونو کې د ځینو هېوادونو د ملاتړي دریځ ستاینه کوي او دا یو حقیقت دی چې د طالبانو له حکومت سره باید مثبت او رغنده خبرې اترې وشي. هيله ده چې نور واقعيتونه هم درک شي او رغنده دريځ به غوره شي.

بايد يادونه وشي، چې د ملګرو ملتونو د بشري حقونو د شورا ځانګړي استازي ريچارډ بينيت پرون د ملګرو ملتونو د بشري حقونو شورا ته په خپل راپور کې وويل: د طالبانو له خوا جنسي تاوتريخوالى ډېر سخت دى.