انصار: (د سلواغی ۱۷ مه)، د امریکا د بهرنیو چارو وزیر انټوني بلېنکن د پنځم ځل لپاره منځني ختیځ ته سفر کړی چې له عربي مشرانو سره د حماس له خوا د نیول شویو اسراییلي بندیانو د خلاصون په اړه خبرې وکړي.
د رویټرز خبري اژانس د راپور له مخې، د امریکا د بهرنیو چارو وزیر د سعودي عربستان پایتخت ریاض ته رسېدلی او د سعودي عربستان له ولیعهد محمد بن سلمان سره یې کتلي دي.
د امریکا د بهرنیو چارو وزارت ویاند «مټیو مېلر» ویلي، په دې لیدنه کې د غزې جګړې د پای ته رسولو، په سره سمندرګي کې د حوثیانو د بریدونو په کمولو او په یمن کې د سولې په اړه خبرې وشوې.
د سپینې ماڼۍ د ویاند په وینا، منځني ختیځ ته د هغه د سفر یو هدف په غزه کې د اسراییلو او حماس ترمنځ اوربند دی.
منځني ختیځ ته د امریکا د بهرنیو چارو وزیر سفر داسې مهال کېږي چې په عراق او سوریه کې د ایران پر ملاتړو ډلو او د یمن پر حوثیانو د امریکا هوايي بریدونه دوام لري.
