انصار: (د مرغومی ۱۲ مه)، د بې پولې خبریالانو نړیوال سازمان د طالبانو رژیم تورن کړی چې د خبریالانو د بنديانولو لپاره د «جاسوسۍ» له تور څخه کار اخلي.

دغه سازمان د افغان خبریالانو د وضعیت په اړه یوه خپاره کړي راپور کې ویلي چې په تېر ۲۰۲۳ کال کې طالب رژیم ۲۱ خبریالان بندیان کړي وو او اوس هم ۳ خبریالان ورسره بندیان دي.

د طالبانو ویاند ذبیح الله مجاهد بیا دغه راپور او تورونه یې رد کړي او ویلي چې دوی د خبریالانو د بندیانولو لپاره دلایل لرل او هغوی محاکمه شوي دي.

طالب چارواکو او قضایي مسوولینو یې تر اوسه د یوه خبریال د محاکمې په اړه هم رسنیو ته څه نه دي ویلي.

د طالبانو رژیم ادعا لري چې خبریالانو او رسنیو ته یې د « اسلامي شریعت او ملي ګټو» پر اساس د فعالیت اجازه ورکړې، خو منتقدان یې باور لري چې طالبان هر هغه څه چې د دوی د سلیقې خلاف وي، د اسلام او ملي ګټو خلاف بولي او عاملینو سره یې ناوړه چلند کوي.

د طالبانو له بیا واکمنیدو سره، زرګونو افغان خبریالانو هېواد پرېښی او تر نیمایي زیاتې رسنۍ د فعالیتونو پای ته رسولو ته اړ شوې دي.