انصار: (د مرغومی پنځمه)،  د فلسطین د روغتیا وزارت ویلي چې اسراییلي پوځ د فلسطیني کډوالو پر «المغازي» کمپ بمبار کړی چې په کې له ۷۰ کسانو ډېر وژل شوي.

د سرچینې د معلوماتو له مخې، دغه برید له ګڼې ګوڼې په ډکه سیمه شوی چې کېدای شي د وژل شویو شمېر تر دې هم لوړ شي.

سرچینې دا هم ویلي چې د غزې په شمال جبالیه کمپ کې هم پر یوه کور د اسراییلو په هوایي برید کې د یوې کورنۍ لس غړي وژل شوي دي.

د فلسطین د سرې میاشتې ټولنې ویلي، د اسراییلو بمبارۍ د مغازي او د کډوالو د دوو نورو کمپونو بریج او النصیرات ترمنځ لارې هم تړل شوې چې د ژغورنې عملیات یې له خنډ سره مخ کړي.

د فلسطین د روغتیا وزارت وایي، پر غزه د اسراییلو په بمباریو کې د وژل شویو فلسطینیانو شمېر له ۲۱ زرو اوښتی چې ډېری یې ماشومان او ښځې دي او۵۴ زره نور ټپیان شوي دي.