انصار: (د لیندی ۲۶ مه)،  تر هغې وروسته چې د مولانا فضل الرحمان په مشرۍ د پاکستان د جمیعت علمای اسلام ګوند له فضل الرحمان څخه پاکستان سره یې د اړیکو د منځګړیتوب لپاره د کابل د واکمن طالب رژیم د غوښتنې خبر ورکړ، په دې اړه بېلابېل غبرګونونه ښودل شوي.

د افغانستان د ملي امنیت پخواني رئیس رحمت الله نبیل ادعا کړې چې فضل الرحمان د افغانستان له پرځېدلي جمهوري نظام څخه په دې نوم میلیونونه ډالره ترلاسه کول چې د افغانستان طالبانو ته یې ورکوي او افغانستان سره یې سولې ته هڅوي.

د ده په وینا، اوس په واقعیت کې فضل الرحمان له پاکستاني چارواکو د طالبانو د ور پخلا کولو لپاره همداسې پروژه اخېستې ده.

د طالبانو یوه مخکیني مقام سید اکبر آغا بیا له فضل الرحمان سره په اسلام اباد کې د طالبانو د سفیر سردار شکېب لیدنه یوه معمول چاره ګڼلې او ویلي تر دې مخکې د طالبانو د بهرنیو چارو وزیر ملا امیرخان متقي هم له نوموړي سره لیدلې.

د اکبر آغا په باور، د طالبانو او پاکستان اړیکې د فضل الرحمان په کچه د چا په وسیله نه شي رغول کېدای.

په کابل کې د طالبانو رژیم په دې اړه څه نه دي ویلي.

د فضل الرحمان ګوند دا هم ویلي چې طالب سفیر ورته د پاکستان لپاره د دوی د رژیم ځانګړی پيغام هم سپارلی، خو جزییات یې نه دي په ډاګه کړي.