انصار: (د لیندی ۲۶ مه)،  د زده کړو لپاره نړیوال مشارکت (GPE) اعلان وکړ چې د افغان ماشومانو د زده کړو د ملاتړ لپاره ۱۱۰ میلیون ډالره ځانګړي کوي.

دې شبکې پرون (شنبې) په یوه خبرپاڼه کې وویل چې هیله لري له دې پیسو به، چې د ملګروملتو د ماشومانو د ملاتړ ادارې، یونسیف او د سېف دي چلدرن ادارې ته سپارل کېږي، په ټول افغانستان کې تر ۷ میلیونه او ۶ سوه ۶۰ زره زیات ماشومان ګټه واخلي.

د زده کړو لپاره د نړیوال مشارکت شبکې دا مرسته په راتلونکو دوو کلونو کې د افغانستان د ښوونځیو د نجونو او هلکانو د ابتدايي مهارتونو د لوړولو لپاره اعلان کړې ده.

د زده کړو لپاره د نړیوال مشارکت اجرايي رییسې لورا فریګینتی وویل چې دا مرسته به افغان ماشومانو ته د زده کړو لار هواره کړي او همداراز به له هغوی سره د زده کړو په برخه کې د سویې په لوړولو کې مرسته وکړي.

د دې شبکې په خبرپاڼه کې همداراز راغلي چې د دې مرستې څه باندې ۵۹ میلیون ډالره به د یونسیف له لارې ولګول شي. همداراز ۵۰ میلیون ډالره نورې به سیف دې چلدرن موسسې ته ورکړل شي چې د زده کړو د کیفیت پر ښه کولو یې ولګوي.

د اکثرو افغانانو په شان نړیواله ټولنه په افغانستان کې د طالبانو له واک ته رسیدو وروسته د زده کړو په ځانګړي ډول د نجونو د زده کړو د وضعیت په اړه ژوره اندېښنه لري. طالبان لا هم په دې نه پوهیږي چې په یوویشتمه پېړۍ کې عصري زده کړو ته ضرورت شته او که نه شته او ایا د نجونو له زده کړو پرته هم یو هیواد پرمختګ کولی شي.