انصار (د لړم ۲۱ مه)، د کډوالو او بېرته راستنېدونکو چارو وزارت لپاره د طالبانو د رژیم چارواکي وايي، چې د پاکستان له زندانونو ۱۹۶ تنه افغان کډوال ازاد او پرون د تورخم له لارې هېواد ته راستانه شوي.

د یاد وزارت د چارواکو په وینا؛ راستانه شوي افغانان د مرستو تر لاسه کولو په موخه د کډوالو نړیوال سازمان ته ورپېژندل شوي دي.

سرچینې نه دي ویلي، چې دغه بندیان له مخکې څخه نیول شوي وو او اوس خوشې شوي، که له پاکستان څخه د شړلو د عملیاتو پر مهال نیول شوي او افغانستان ته استول شوي.

پاکستاني چارواکو تر هغې وروسته، چې له دغه هېواده افغان کډوالو ته د وتو خبرداری ورکړ، د دوی د نیولو لپاره یې عملیات پيل کړل، چې په ترڅ کې یې ګڼ اسناد لرونکي او بې اسناده کډوال بندیان او تري تم کړل.

د بندي شویو کډوالو کورنۍ وایي چې د خپلو بندیانو د برخلیک په اړه نه پوهیږي.

د پاکستان موقت حکومت په دې پلمه، چې ګواکې په دغه هېواد کې مېشت افغان کډوال د نا امنیو لامل دي او ورسره ترهګریز بریدونه زیات شوي، د ۱،۷ میلیونو هغو کسانو په ګډون چې پاکستان یې بې اسناده کډوال بولي، د ټولو افغان کډوالو د ویستو پریکړه وکړه.

د دغې پریکړې د عملي کیدو پر روان بهیر سخت اعتراضونه دي او ویل کیږي، چې پاکستاني پولیس افغان کډوال لوټي، شتمنۍ یې ضبطوي او ان د بې عزتۍ تر حده سپک چلند ورسره کوي.

یو شمېر نورو پاکستاني سیاستوالو  هم د خپل حکومت دا چلند تر نیوکو لاندې راوستی او پرې د بیا کتنې غوښتنه یې کړې ده.