انصار:( د لړم ۱۶مه)، د ایران د کورنیو چارو وزیر احمد وحيدي د طالبانو د ریاست الوزرا له اقتصادي مرستیال ملا عبدالغني برادر اخوند سره په لیدنه کې ویلي، ایران غواړي چې د افغانستان له لارې له چین سره وصل شي.
نوموړي دغه راز د د افغانستان له لارې اوزبکستان د ایران په واسطه له عمان بحيرې سره د نښلولو غوښتنه کړې.
د ملا برادر دفتر ویلي: په دې لیدنه کې د افغانستان او ایران ترمنځ د ګډ بازار په جوړولو، د سرحدونو په پیاوړتیا، له نشه يي توکو سره په ګډې مبارزې، د سوداګرۍ او ترانزیټ پر زیاتوالي، د چابهار- نیمروز، هلمند - کندهار د رېل پټلیو په جوړېدو او یو شمېر نورو موضوعاتو خبرې شوې دي.
د دغې لیدنې پر مهال طالب لوري له ایران څخه د افغان کډوالو د هغه چلند له امله، چې دوی غوره بللی، مننه کړې ده.
دا په داسې حال کې ده چې د طالب چارواکو د معلوماتو له مخې، تېره اوونۍ ایران هم تر ۲۰ زرو پورې افغان کډوال یوازې د اسلام قلعه بندر له لارې شړلي دي.
