انصار:(  د لړم ۹مه)  د طالبانو د بهرنیو چارو سرپرست وزیر مولوي امیرخان متقي د ترکیې د بهرنیو چارو له وزیر هاکان فدان سره په لیدنه کې د دوه اړخيزو ډيپلوماتيکو اړيکو په پراختیا، د نويو سوداګريزو دهلېزونو په پرانیستلو او یو شمېر نورو سیمه ییزو موضوعاتو خبرې کړې.

د ملا متقي مطبوعاتی دفتر لیکلي، په لیدنه کې د ترکیې بهرنیو چارو وزیر ویلي، چې نور باید په افغانستان کې وسله وال مخالفت وجود ونه لري.

نوموړي زیاته کړې؛ چمتو یو چې د ظرفیت لوړونې او نورو بېلابېلو برخو کې له طالبانو حکومت سره همکاري وکړو.

د ترکیې بهرنیو چارو وزارت د دغې لیدنې د جزییاتو په اړه څه نه دي ویلي.

ترکیه د طالبانو د یو زیات شمېر مخالفو سیاسي څېرو؛ په ځانګړي ډول د شمال ټلوالې د پخوانیو جنګسالارانو کوربه ده.

دغه پخواني سیاستوال، چې تر ډېره ( د ملي مقاومت عالي شورا) په چوکاټ کې را ټول دي، طالبانو ته ډېر ځله د خبرو له لارې د افغانستان د قضیې د حل او ورسره د وسله وال مخالفت خبرې کوي.

د طالبانو نور منتقدان دوی تورنوي چې د ملایي رژیم له تحمیلولو او د ټولو غیر طالب افغانانو له منزوي کولو سره یې افغانستان منزوي کړی او پخوانیو جنګسالارانو ته د جګړې د خبرو فرصت ورکړی.