انصار:( د لړم ۶مه)،  په افغانستان کې د ملګرو ملتونو مرستندوی ماموریت یوناما له زیاتو جزییاتو پرته ویلي، چې د بشري حقونو د مدافعانو او فعالانو پر خوندیتوب کار کوي.

دغه ماموریت همدا شان، د طالبانو د استخباراتو له زندانه د قلم لار ټولنې د مشر مطیع الله ویسا خوشې کېدل ستایلي او دا یې مثبت ګام بللی.

د مطیع اله ویسا ورور، عطا اله ویسا ویلي، چې ورور یې د طالبانو په توقیف کې د ۲۱۵ ورځو له تېرولو وروسته تېره پنج شنبه خوشې شو. 

له دې سره، راپورونه ښيي چې په نامعلوم شمېر د بشري حقونو او نورو برخو فعالان لا هم د طالبانو په زندانونو کې بندیان دي او برخلیک یې نه دی معلوم.

طالبانو نه دي ویلي چې مطیع الله ویسا یې په کوم جرم او د کومې محکمې په حکم نیولی و او بیرته یې په کوم حکم خوشې کړ.

د طالبانو ویاند ذبیح الله مجاهد وړاندې د نوموړي فعالیتونه شکمن او د خپل رژیم خلاف ګڼلي وو، خو ویل کیږي چې له اوږده بند وروسته هم طالبانو پر ښاغلي ویسا کوم جرم ثابت کړی نه دی.

د طالبانو له بیا واکمنیدو سره د بېلابېلو قشرونو مطرحو څېرو افغانستان پریښی او جلا وطنۍ ته اړ شوي دي.