انصار (دوشنبه، د سنبلې ۲۰ مه) د پاکستان د کورنیو چارو وزیر افغانانو ته خبرداری ورکړ چې په خپله ځان ته د لارې ټکټ واخلي او ژر تر ژره له پاکستانه ووځي کنې سخته سزا به ورکړي.

په همدې حال کې د پاکستان اې آر وای تلویزیون راپور ورکړ چې د کراچۍ پولیسو پرون (یکشنبه) ۱۲۱ افغانان په دغه ښار کې نیولي دي.

د پاکستان د کورنیو چارو وزیر سرفراز بوګټي په یوه خبري غونډه کې وویل:افغانانو ته وایم چې همدا اوس مو د لارې ټکټونه واخلئ او خپل هیواد ته لاړ شئ، که ونیول شوئ، لږترلږه به لس کاله په زندان کې پراته یاست.

ده وویل، پرېکړه شوې چې له ټولو ښارونو غیرقانوني افغانان راټول او ونیول شي. عملاً پاکستاني پولیس هغه افغانان هم نیسي چې قانوني اسناد لري. ډیر افغانان شکایت کوي چې د پاسپورټ او ویزې له لرلو سره سره یې پولیس نیسي او پیسې ورڅخه غواړي.

د پاکستان پولیس د فساد له نظره د نړۍ تر ټولو فاسد پولیس ګڼل کېږي. خو اوس چې د کورنیو چارو وزیر په کچه یوه چارواکي هم د افغانانو د نیولو او په لس کاله بند محکومولو اعلان وکړ، ښايي په پاکستان کې د افغانانو ځورول لا زیات شي.

د چارو کتونکي وايي، پاکستان له هرې لارې چې ممکنه وي غواړي چې د افغانستان د طالبانو پر حکومت فشار راوړي چې په ټي ټي پي کې له خپل نفوذه په استفادې دا ډله په پاکستان کې له حملو راوګرځوي.