پولیس وايي، پلازمېنه کابل کې د شویو غبرګو چاودنو مرګ ژوبله ۲۲ تنو ته رسېدلې ده.

 دغه چاودنې پرون سه شنبې د غبرګولي ۱۱ مه د کابل ښار د درېیمې ناحیې اړوند سرکارېز سیمه کې وشوې.

د کورنیو چارو وزارت وايي دواړه چاودنې د لیین په کاسټر موترو شوې، چې له امله یې ۲۲ تنو ته مرګ ژوبله اوښتې ده.

د کابل د پولیسو ویاند فردوس فرامرز وايي، په دغه چاودنو کې ۱۰ تنه ملکي وګړي وژل شوي او ۱۲ نور ټپیان شوي دي.

تر اوسه د دغه چاودنو مسوولیت چا نه دی منلی.