د ناټو د غړو هېوادونو د دفاع او بهرنیو چارو وزیران د افغانستان په اړه غونډه کوي، چې په کې به پر مهمو مسایلو خبرې اترې وشي.

دغه غونده به نن سه شنبې د غبرګولي ۱۱ مه بروکسل کې جوړه شي.

د ناټو عمومي منشي ینس سټولټنبرګ ویلي، په دې غونده کې په افغانستان کې پر روان وضعیت، د سولې پر هڅو، د بهرنیو ځواکونو پر وتلو خبرې وشي.

دغه راز نوموړي زیاته کړې، چې د سرتېرو تر وتلو وروسته د افغان پوځ پر ملاتړ او په یوه بل هېواد کې د افغان ځواکونو د روزنې ماموریت هم هغه موضوعات دي، چې بحث به پرې وشي.

د ناټو سرمنشي وايي، په افغانستان کې به د ناټو ملکي ماموریت دوام کوي او هڅه کوي له دغه هېواد سره د ظرفیت جوړونې او پرمختګ په برخه کې همکارۍ ډېرې شي.

ټاکل شوې چې دغه غونډه کې نن د شاوخوا دېرشو هېوادونو د بهرنیو چارو او دفاع وزیران ګډون وکړي او د افغانستان پر وضعیت به بحثونه ولري.

دا په داسې حال کې ده، چې اروپايي ټولنې پرون اعلان وکړ، چې دوی د بهرنیو ځواکونو له وتلو وروسته هم افغانستان کې خپل ماموریت ته دوام ورکړي او ژمنې یې پر ځای دی.