راپورونه او سیمه ییز روغتیايي چارواکي وايي، د کابل - کندهار پر لویه لار د زابل ولایت اړوند سیمه کې د سړک د غاړې ماین چاودنې ۴۰ تنو ته مرګ ژوبله اړولې ده.
مخې چاودنه تېره شپه (د غوايي ۱۹مه) د زابل ولات په شهر صفا ولسوالۍ کې پر یوه مسافر وړونکي بس موټر شوې ده.
ویل کېږي دغه مسافر وړونکی بس موټر چې د مېرویس نېکه ټرانسپورتي شرکت اړوند دی له کابله - کندهار ته پر لار و، چې زابل کې پرې چاودنه شوې.
لومړي راپورنه وايي، په دغه چاودنه کې کابو ۲۵ تنه مسافر وژل شوي او ۱۶ نور ټپیان شوي دي.
د زابل د عامې روغتیا رییس لعل محمد توخي هم تایید کړې، چې د پېښې له ځایه لسګونه جسدونه او ټپیان وروړل شوي خو وايي، کره ارقام به یې وروسته له رسنیو سره شریک کړي.
په ورته وخت کې سرچینې وايي، ځېنې ټپیان د درملني په موخه د کندهار مېرویس حوزوي روغتون ته هم انتقال شوي دي.
تر اوسه د دغه چاودنې مسوولیت چا نه دی اخیستی.
