انصار: ( د لیندۍ ۲۴ مه)، د افغانستان د کرکټ ملي لوبډلې زیمبابوې ته په ۵۰ منډو ماته ورکړه چې ورسره د شل اوره سیالیو لړۍ یو پر یو شوه او نن به وروستۍ مسابقه د دې لړۍ ګټونکی معلوم کړي.

افغانستان تېره سیالي په خورا لږ توپیر بایللې وه.

پرون هم پچه افغانستان وګټله او لومړی یې توپ وهنه غوره کړه. بیا هم د افغانستان پیلګر لوبغاړي ژر وسوځېدل، رحمت الله ګوربزپه ۱۱ توپونو ۱۱، صدیق الله اتل په ۱۲ توپونو ۱۸ او زبید اکبري په ۲ توپونو۱ منډې وکړې.

خو یوازې دروېش رسولي په ۴۲ توپونو ۵۸ منډې وکړې. او د لوبې غوره لوبغاړی وپېژندل شو. ګلبدین نایب هم په ۲۱ توپونو ۲۶ ناسوځېدلې منډې په خپل ریکارډ کې ثبت کړې.

د افغانستان لوبډلې زیمبابوې ته ۱۵۴ منډې هدف وټاکه چې تر تېر ځل کابو ۱۰ منډې زیاتې وې.

افغان باولران دا ځل ښه وځلېدل. نوین الحق په ۴ اورونو کې ۳ لوبغاړي وسوځول او ۱۹ منډې یې ورکړې. مجیب الرحمان بیا په ۴ اورونو کې ۲ لوبغاړي په داسي حال کې وسوځول چې ۳۰ منډې یې ورکړې. راشدخان په ۴ اورونو کې ۲۰ منډې ورکړې خو ۳ لوبغاړي یې وسوځول. دوه نور عظمت الله عمرزي او فرید ملک وسوځول.

ټاکل شوې ده چې نن د افغانستان او زیمبابوې ترمنځ درېیمه شل اوره سیالي وشي او ورپسې یو درې یو ورځینۍ مسابقې وکړي. دواړه ټیمونه دوې ټیستلوبې هم کوي. دا سیالۍ د زیمبابوې په کوربه توب په هرارې کې کېږي.