انصار: (د کب 14 مه)، د طالبانو حکومت ملي دفاع وزارت ویلي، چې د دغه وزارت سرپرست مولوي محمد یعقوب مجاهد او د طالبانو د وسلهوال پوځ لوی درستیز قاري فصیح الدین الدین فطرت قطر ته سفر کړی.
د طالبانو تر واک لاندې خبري رسنیو ویلي، ښاغلی مجاهد به له قطري چارواکو سره د دوه اړخیزو اړیکو پر پیاوړتیا خبرې وکړي او د دغه هېواد د "ډیمډکس" دفاعي نندارتون په غونډه کې به هم ګډون وکړي.
د طالبانو حکومت د دوحې په دغه دفاعي او امنیتي نندارتون کې د ګډون لپاره ددغو دوو جګپوړو دفاعي چارواکو د سفر په اړه ډېر جزییات نه دي خپاره کړي.
د ۲۰۲۲ کال جولای لومړیو کې هم د طالبانو د ملي دفاع وزارت چارسمبالي ملا محمد یعقوب مجاهد قطر ته سفر کړی و او له قطري چارواکو سره یې د طالبانو حکومت د ځواکونو د تنخاوو، یونیفورم، روغتیا، د سرحدونو د ساتنې لپاره د تخنیکي وسایلو او وسایطو په اړه د همکارۍ غوښتنه کړې وه.
ښاغلي مجاهد ویلي: "د پوځ د تنخاوو په اړه مو د همکارۍ غوښتنه ترې وکړه، ځکه چې قطر یو اسلامي هېواد دی. د یونیفورم جوړلو کې مو همکاري ترې وغوښته".
ملا محمد یعقوب مجاهد له قطر نه تر ستنېدا وروسته ویلي وو، د قطر له امیر سره خبرو کې یې پر امنیتي او د دفاع وزارت اړوندو مسلو مهمې خبرې درلودې.
د سږني اتم ’ډیمډکس’ نندارتون او کنفرانس شعار دی (له سمندري امنیتي پولې هاخوا د راتلونکې لپاره د لارې رڼا کول) چې د مارچ پر څلورمه ( نن د دوشنبې په ورځ) به د قطر د امیر په لاس پرانیستل شي.
د قطر خبري اژانس ویلي، د قطر امیر شیخ تمیم بن حمد آل ثاني به د دوحې نړیوال سمندري دفاع ’ډیمډکس’ نندارتون او کنفرانس- چې سږ کال ورته شعار (له سمندري امنیتي پولې هاخوا د راتلونکې لپاره د لارې رڼا کول) ټاکل شوی- د دوشنبې په ورځ پرانیزي.
دا په خپل ډول کې د ډیمډکس اتم نندارتون دی چې د قطري سرچینو په وینا، په دفاعي او امنیتي چارو کې څه باندې ۲۰۰ نړیوال شرکتونه او ملي متخصصې څېرې به ګډون پکې وکړي.
د یاد نندارتون په اوو بېلابېلو نندارتون ځایونو کې به د وروستیو دفاعي اختراعاتو او ټیکنالوجۍ نندارې جوړې شي.
URL تعقيب: https://www.ansarpress.com/pashto/30432
امرالله صالح: د طالب جګړه د دین لپاره نه د قدرت لپاره ده، د نورو د ګټو لپاره خپل خلک وژني