انصارپرس: د طالبانو عامې روغتیا وزارت نن (دوشنبه) د هېواد په 18 ولایتونو کې د پولیو ضد واکسین د کمپاین له پیلېدو خبر ورکړی دی.

د دغه وزارت ویاند، شرافت زمان امرخیل ویلي چې یاد کمپاین په کابل، ننګرهار، لغمان، کونړ، نورستان، پکتیا، پکتیکا، خوست، غزني ، کندهار، هلمند، ارزګان، زابل، بلخ، فاریاب، کندز، هرات او بادغیس ولایتونو کې پیل شوی چې په پرمهال به یې له پنځه‌کلنۍ کم‌عمره 7٫3 میلیون ماشومان واکسین ترلاسه کړي.

ښاغلي امرخیل ویلي چې همدا کمپاین د لا ښه چمتوالي په موخه د فاریاب په 2 ولسوالیو او د بادغیس په 2 ولسوالیو کې د فبروری له 9 تر 12 ترسره کېږي.

تر دې مخکې له پولیو څخه پاک افغانستان په نوم ادارې هم خبر ورکړی چې د افغانستان په یو شمېر ولایتونو کې به د پولیو ضد واکسین کمپاین پیل شي. 

د یادولو ده چې په نړۍ کې پاکستان او افغانستان دوه هغه هېوادونه دي چې لا هم پکې د پولیو یا ګوزڼ ویروس شته او تازه پېښې پکې ثبتېږي.  

بلخوا د طالب چارواکو بار بار له هېوادوالو غوښتي چې خپلو ماشومانو ته واکسین تطبیق کړي.