انصارپرس: (د لیندۍ 7 مه)، این ډي ټي وي راپور ورکړ چې په یوه مهم پرمختګ کې چې د افغانستان- هند د اقتصادي همکاریو د نوې مرحلې پیغام ورکوي او د پاکستان د سیمه‌ییزې سوداګرۍ د نفوذ لپاره لوی ګوزار بلل کېږي، د هند او افغانستان مخکښو درملو جوړوونکو شرکتونو د 100 میلیون ډالرو په ارزښت هوکړه‌لیک (MoU) لاسلیک کړی دی.

دا موافقه یوازې څو ورځې وروسته له هغه شوې چې د طالبانو د صنعت او سوداګرۍ وزیر الحاج نورالدین عزیزي د سوداګرۍ او پانګونې د پراخولو په موخه په هند کې خپل رسمي سفر پای ته ورساوه.

دغه هوکړه د افغانستان د روفی اینټرنیشنل ګروپ آف کمپنۍز او د هند د Zydus Lifesciences ترمنځ په دوبۍ کې لاسلیک شوې ده، چې د افغانستان د درمل جوړونې سکتور د بیا رغونې او د هند د روغتیايي خدماتو په ساحه کې د نفوذ د پراختیا لپاره یو تاریخي ګام بلل کېږي. د لاسلیک مراسم د افغانستان په قونسلګرۍ کې د افغان سفیر او جګپوړو سوداګریزو چارواکو په حضور کې ترسره شول.

د افغانستان د صنعت او سوداګرۍ وزارت په وینا، Zydus Lifesciences به لومړی افغانستان ته درمل صادر کړي. وروسته به خپله نمایندګي افغانستان ته ولېږدوي او هلته به د درملو تولید پیل کړي. چارواکي وايي د محلي تولید لپاره د تخنیکي معلوماتو او تخنیکي مهارت د لېږد بهیر پیل شوی دی.

یو بدیل او بدلون راوونکی ګام...

د افغانستان قونسلګرۍ دا موافقه د بدلون راوړونکي ګام په توګه ستایلې ده، چې د روغتیا د خدمتونو کیفیت به لوړ کړي، د ټیټ کیفیت وارداتي درملو پورې تړاو به کم کړي، او د افغانستان د درملو تولید فابریکو تخنیکي وړتیاوې به تر ډېره پیاوړې کړي. افغان سوداګرو هم دا موافقه د راتلونکو ستراتیژیکو همکاریو یو بریالی ماډل بللې ده.

دا پرمختګ په داسې وخت کې ترسره کېږي چې طالبانو له پاکستان سره سوداګري په رسمي ډول بنده کړې او افغان شرکتونو ته یې درې میاشتې مهلت ورکړی څو له پاکستاني درملو جوړوونکو شرکتونو سره خپل سوداګریز تړونونه پای ته ورسوي.

له همدې امله، د هند او افغانستان تازه شوې موافقه د پاکستان لپاره یو ښکاره شاته تګ بلل کېږي؛ هغه هېواد چې له کلونو راهیسې د افغان سوداګرۍ د تګ راتګ اصلي ترانزیټ او بازار و.