انصار: (د مرغومی ۲۵ مه)د  کندهار له طب پوهنځي څخه ۸۷ تنه ډاکټران فارغ شول. د کندهار لپاره د طالبانو د اطلاعاتو او فرهنګ ریاست په خپله ایکس پاڼه کې لیکلي، چې د یکشنبې په ورځ په همدې موخه مراسم جوړ شوي وو.

سرچینې په دې تړاو نور جزئیات نه دي ورکړي.

د دغه فراغت اړوند په خپور شوي تصویر کې لیدل کیږي، چې ټول فارغان نارینه دي.

د طالبانو له بیا واکمنیدو سره، دوی له نجونو څخه په ښوونځیو کې له شپږم څخه د پورته ټولګیو او په پوهنتونونو کې یو مخ د زده کړو حق واخیست.

د دې ترڅنګ یې د نجونو د زده کړو خصوصي مرکزونه هم وتړل.

د کندهار له طب پوهنځي په داسې مهال نارینه ډاکټران فارغیږي، چې د طالبانو د روغتیا د وزیر په وینا، افغانستان د ښځینه ډاکټرانو له کمښت سره مخ دی.