انصارپرس: ( د سنبلی 7مه)، د لغمان مسوولین وایي، د یاد ولایت مرکز مهترلام ښار کې د رېکشې د ګازو ډبې چاودنې له امله 14 کسان ټپيان شوي دي. 

مسوولینو ویلي چې دا چاودنه د مهترلام ښار په رحماني چوک سیمه کې شوې او په دې اړه څېړنې پیل شوې دي.

پرون ځینو رسنیو په مهترلام ښار کې د چاودنې خبر ورکړی او ویلي یې وو چې له دې امله یو شمېر کسانو ته مرګ‌ژوبله اوښتې ده.

خو بلخوا د دغه ولایت مقام ویلي چې دا پېښه د رېکشا د ګازو ډبې د چاودنې له امله شوې ده.

 مسوولینو دا پېښه جدي نه ده بللې او په وینا یې چې ټپيان د درملنې په موخه روغتون ته لېږدول شوي دي.

د یادولو ده چې د رېکشا د ګازو ډبې چاودنې کمې کېږي، خو د پېښېدو په صورت کې یې بیا ډېرې خطرناکې هم تمامېدای شي.

لغمان او ننګرهار له هغو ولایتونو څخه دي چې رېکشاوې پکې زیاتې دي او د سورلۍ د لېږد رالېږد لپاره ترې استفاده کېږي.

څه موده مخکې په مهترلام ښار کې په عمومي سړکونو د رېکشاوو پر چلونې هم بندیز لګېدلی و.