انصارپرس: ( د زمری 19مه)، د طالبانو حکومت د کورنیو چارو وزارت د هغه 134 کیلوګرام نشه‌يي توکو له ترلاسه‌کېدو خبر ورکړی چې له بدخشان څخه هلمند ولایت ته قاچاق کېدل.

د دغه وزارت د خبرپاڼې له مخې چې دا توکي د څلورو کسانو له لوري په یو موټر کې ځای پرځای شوي وو او په میدان‌وردګ ولایت کې د پلټنې پرمهال نیول شوي دي.

سرچینې لیکلي چې په دې تړاو نیول‌شوي څلور کسان به ژر عدلي او قضايي ارګانونو ته ور وپېژندل شي.

له تېرو څو میاشتو راهیسې په بېلابېلو ولایتونو کې د نشه‌يي توکو په تړاو سلګونه کسان نیول شوي او زرګونه کیلوګرام بېلابېل نشه‌يي توکي کشف او ضبط شوي دي.

د یادولو ده چې د طالبانو حکومت له بیاځلي واکمنېدو وروسته په ټول هېواد کې د نشه‌يي توکو پر هر ډول کاروبار کلک بندیز لګېدلی او له تېرو نږدې پنځو کلونو راهیسې د نشه‌يي توکو لسګونه کارخونې هم له منځه وړل شوې دي.

بلخوا د طالبانو حکومت کورنیو چارو وزارت ټینګار کړی چې په هېواد کې د نشه‌يي توکو د هر ډول کاروبار پر وړاندې به جدي مبارزه کېږي، او هېچا ته به په دې برخه کې د فعالیت اجازه نه ورکول کېږي.