انصارپرس: ( د زمري3مه)، د امریکا ولسمشر، ډونالډ ټرمپ وایي چې روانه اوونۍ به د اسرائیلو له لومړي وزیر «بنیامین نتنیاهو» سره د ایران جګړې په ګډون پر بېلابېلو سیمه‌ییزو موضوعاتو مخامخ خبرې وکړي.

ټرمپ تایید کړې چې «بنیامین نتنیاهو» به راتلونکې اوونۍ واشنګټن ته ورشي، او دواړه به د سیمې پر روان وضعیت خبرې وکړي.

ویل شوي چې «ډونالډ ټرمپ» او «بنیامین نتنیاهو» به د امریکا - اسرائیل د سټراټیژیکو همکاریو په ګډون د ډېرو نورو موضوعاتو په اړه هم خبرې وکړي.

واشنګټن ته د اسرائیلو د لومړي وزیر سفر داسې مهال وروسته له هغې پلان شوی چې په وروستیو کې د دغو دواړو کسانو ترمنځ اړیکې هم په بې‌سارې توګه ترینګلې شوې دي.

څه موده مخکې ډونالډ ټرمپ د اسرائیلو لومړي وزیر په ټلېفوني خبرو کې توندې څرګندونې کړې وې او خبرداری یې ورکړی چې نور باید د سیمې د وضعیت په اړه خپله پالیسي تغییر کړي. 

د ځینو رسنیو د راپورونو په حواله چې ټرمپ، نتنیاهو ته توندې خبرې هم کړې وې او سپکاوی یې کړی و.

څو ورځې مخکې هم د امریکا ولسمشر، ډونال ټرمپ ویلي وو چې نوموړی فکر کوي چې د ځینو نړیوالو پرېکړو په برخه کې د اسرائیلو لومړي وزیر، بنیامین نتنیاهو دوکه ورکړې ده.