انصارپرس: ( دسرطان29مه)، د طالبانو کورنیو چارو وزارت خبر ورکړی چې د کابل ښار په بېلابېلو سیمو کې د جلا عملیاتو پرمهال 22 زره 143 د نشې ګولۍ کشف او ضبط شوې دي.

د دغه وزارت په اېکس‌پاڼه لیکل شوي چې دا عملیات د نشه‌يي توکو پر وړاندې د مبارزې ځواکونو له لوري شوي دي.

د خبرپاڼې له مخې چې د دغو نشه‌يي توکو په تړاو درې کسان نیول شوي چې له لومړنیو څېړنو وروسته به عدلي او قضايي ارګانونو ته ور وپېژندل شي.

طالبانو له بیاځلي واکمنېدو وروسته په ټول هېواد کې د نشه‌يي توکو پر کښت، قاچاق، خرڅلاو او هر ډول کاروبار کلک بندیز لګېدلی دی.

د یادولو ده چې له تېرو نږدې پنځو کلونو راهیسې د کابل ښار په ګډون په بېلابېلو ولایتونو کې د نشه‌يي توکو سلګونه کاروباریان نیول شوي او همداراز د نشه‌يي توکو لسګونه کارخونې کشف او له منځه وړل شوې دي.

بلخوا د طالبانو کورنیو چارو وزارت خبرداری ورکړی چې په ټول هېواد کې به د نشه‌يي توکو پر وړاندې مبارزه جدي روانه وي او هېڅوک به د دغو توکو کاروبار ته نه پرېښودل کېږي.