انصارپرس: ( دسرطان27مه)، نړیوالو رسنیو راپور ورکړی چې د چین په «چونګ‌چینګ» ښار کې د ځمکې ښویېدو له امله د مړو شمېر 8 کسانو ته رسېدلی او له 10 ډېر نور ټپيان شوي دي.

په راپورونو کې د چینایي چارواکو په حواله ویل شوي چې دا پېښه پرون (جمعه، سرطان 26مه) سهار مهال شوې او له امله یې نږدې 40 کسان لادرکه شوي دي.

د چینايي چارواکو په وینا چې له دې پېښې وروسته له 1000 ډېر کسان له خپلو کورونو ایستل شوي او امن ځای ته لېږدول شوي، او په ټپيانو کې د دوو کسانو روغتیايي وضعیت نازک ښودل شوی دی.

د راپورونو له مخې چې د ځمک‌ښویېدنې د دې پېښې له امله څو استوګنیز کورونه نړېدلي او د ژغورونې عملیات پيل شوي دي.

په وروستیو کې د نړۍ په بېلابېلو هېوادونو کې د ځمکې ښویېدو پېښې زیاتې شوې چې له امله یې وخت ناوخت لسګونه کسانو ته مرګ‌ژوبله اوړي.

د یادولو ده چې افغانستان هم یو له هغو هېوادونو دی چې یوازې سږ کال پکې د ځمکې‌ښویېدو لسګونه پېښې شوې او له امله لسګونه کسانو ته مرګ‌ژوبله اوښتې ده.

د ځمکې ښویېدو پېښې ډېری لاملونه ځمکلړزې او زیات ورښتونه بلل کېږي.