انصارپرس: ( د سرطان21مه)، د ننګرهار مسوولین وایي، د یاد ولایت په پچیراګام ولسوالۍ کې د یو موټر چپه‌کېدو له امله شپږ کسان مړه او 8 نور ټپيان شوي دي.

د دغه ولایت امینې قوماندانۍ د خبرپاڼې له مخې چې دا پېښه د پچیراګام ولسوالۍ په «مرغۍ» سیمه کې د ډاډسن موټر د چپه‌کېدو له امله شوې ده. 

سرچینې لیکلي چې په قربانیان کې څلور ښځې او دوه نارینه شامل دي او ټپيان د درملنې په موخه روغتون ته وړل شوي دي.

له تېرو نږدې پنځو کلونو راهیسې په هېواد کې ترافیکي پېښې په بې‌سارې توګه زیاتې شوې چې ستر لاملونه یې د چلوونکو بې‌احتیاطي، خراب سړکونه، ګړندی تګ او د ترافیکي اصولو نه‌مراعاتول بلل کېږي. 

بلخوا د طالبانو حکومت مسوولینو بار بار له چلوونکو غوښتي چې د هر ډول سفر پرمهال احتیاط او د مسافرو ژوند وژغوري.