انصارپرس: ( د سرطان19مه)، د امریکا بهرنیو چارو وزارت وايي طالبان د " یرغمل نیونې ډیپلوماسۍ" ته دوام ورکوي او له طالبانو یې وغوښتل چې پاته امریکايي بندیان خوشې کړي.

 د امریکا د بهرنیو چارو وزارت ویاندې الیزابیت سټیکني داهم وویل چې طالبان باید د ښځو او نجونو پر وړاندې د بشري حقونو سرغړونې ودروي.

د امریکا د بهرنیو چارو وزارت ویاندې الیزابت سټیکني د پنجشنبې په ورځ (د چنګاښ 18مه) له ازادي راډیو سره مرکه کې وویل چې طالبان د "یرغمل نیونې ډیپلوماسۍ" تګلارې ته دوام ورکوي.

هغې یوځل بیا د امریکايي بندیانو د خوشې کیدو غوښتنه وکړه او وویل: "له بده مرغه وینو چې طالبان د یرغمل ډیپلوماسۍ ته دوام ورکوي، او موږ غواړو چې ټول هغه امریکایي وګړي چې په ناحقه نیول شوي خوشې شي."

د 2021 کال په اګست کې پر افغانستان د طالبانو له بیا واکمنېدو وروسته تیرو کلونو کې د دوی له زندانونو څخه پنځه امریکایي وګړي خوشې شوي دي، خو د راپورونو له مخې لږ تر لږه دوه نور لا هم بندیان دي.