انصارپرس: (د سرطان14مه)، د پولنډ حکومت وايي چې د دغه هېواد پولیسو د 15 افغانانو په ګډون 54 کډوال نیولي دي. 

پولنډي پولیسو ویلي چې په نیول‌شویو کډوالو کې 15 د افغانستان، 30 پاکستانیان او 9 بنګله‌دېشان شامل دي، او دوی په غیرقانوني ډول له «لیتوانیا» څخه پولنډ ته د اوښتو هڅه کوله.

د راپورونو له مخې چې دا کډوال اخراج پروسې له بشپړېدو وروسته بېرته لیتوانیا ته ګرځول شوي دي. 

د پولنډ حکومت په خبرپاڼه کې همداراز ټینګار شوی چې د دوی سرحدي پولیس به سرحدونو کې د غیرقانوني کډوالو د ننوتلو جدي مخه نیسي.

دا په داسې حال کې ده چې له تېرو څو کلونو راهیسې د جرمني په ګډون ځینو اروپایي هېوادونو کې د افغان کډوالو د نیولو لړۍ هم چټکه شوې او ډېری بېرته افغانستان ته رالېږل شوي دي.

پر دې سربېره د سیمې او ګاونډیو هېوادونو څخه هم د افغان کډوالو ایستل په بې‌سارې توګه زیات شوي دي.

بلخوا ځینې اروپايي هېوادونو ویلي چې دوی تر ډېره هغه کډوال وباسي چې د دوی امنیت ته ګواښ پېښوي او جرمونه ترسره کوي.

د ویلو ده چې له تېرو څو کلونو راهیسې په ځینو اروپايي هېوادونو کې د افغان کډوالو له لوري د وژنې ځینې پېښې هم ثبت شوې دي.