انصارپرس: ( د سرطان6مه)، د هرات مسوولین وایي چې په دغه ولایت کې د ټاپي پروژې ګازو نل‌لیکې د غځولو چارې چټکې شوې او تر اوسه له 90 کیلومترو زیاته نل‌لیکه غځول شوې ده.

مسوولینو ویلي چې د دې ترڅنګ شاوخوا 125 کیلومتره لار هواره شوې او تر راتلونکو شپږو میاشتو پورې به د هرات صنعتي ښارګوټي ته ورسېږي.

ویل کېږي چې د ترکمنستان له پولې تر هرات ښاره پورې د دې نل‌لیکې ټول اوږدوالی 153 کیلومتره دی، او اوسمهال یې هلته چارې په چټکۍ پیل شوې دي.

څه موده مخکې د هرات ولایت مقام خبر ورکړی و چې هغه مهال د ټاپي پروژې 84 کیلومتره نل‌لیکه غځول شوې او د 130 کیلومتره مسیر بنسټیزې چارې بشپړې شوې وې.

د ولایت مقام په اېکس‌پاڼه لیکل شوي وو چې  108 کیلومتره سړک هم بشپړ شوی دی او د دې مهمې اقتصادي پروژې د ژر بشپړېدو لپاره هڅې روانې دي.

د هرات مسوولینو همداراز ډاډ څرګند کړی چې دا پروژه به د 2027 میلادي کال په لومړیو کې ګټې‌اخیستنې ته وسپارل شي.

ټاپي د ترکمنستان، افغانستان، پاکستان او هندوستان ګډه لویه پروژه ده چې له ترکمنستان پیل او په هند کې پای ته رسېږي.