انصارپرس: ( د حمل19مه)،  امریکا او ایران تیره شپه په یوه اوربند سلا شول. ولسمشر ټرمپ چې پرون یې ایران ته ګواښ کړی وو وویل چې د ایران له لورې یې د لسو ټکو یو وړاندیز ترلاسه کړی دی . تهران هم ویلي چې ددواړو خواوو ترمنځ د ځانګړو شرطونو په اساس اوربند رامینځ ته  شوی دی.

د امریکا ولسمشر ډونالډ ترمپ او ایران د پاکستان په منځګړیتوب د دوه اونیو اوربند باندې سلا شول ترڅو له جګړې ترشا او دواړو خواوو ته د سولې د یوې هوکړې لپاره د خبرو وخت برابر شي.

ټرمپ چې د سه شنبې ورځې (د اپریل 7مه ) په لومړیو ساعتونوکې یې ګواښ کړی وو : «که ایران یوې هوکړه ونکړي ، نو نن شپه به یوټول مدنیت له منځه ولاړ شي»، په ټولنیزو رسنیو کې په یوه پیغام کې وویل چې له تهران څخه یې د لسو ټکو یو وړاندیز ترلاسه کړی او باور لري چې «دا د خبرو اترو لپاره یو عملي بنسټ دی.»

بلخوا دایران سپاه پاسداران ځواکونو ته نږدې تسنیم خبري اژانس تایید کړه چې د دواړو خواوو ترمنځ د ځانګړو شرطونو په اساس اوربند رامینځ ته شوی دی.