انصارپرس: ( د حمل10مه)، ټاکل شوې ده چې د هېواد په 15 ولایتونو کې د 1405 هـ. ل کال د کانکور آزموینې لومړی پړاو سږکال بیا هم د نجونو له ګډون پرته د راروانې غويي یا ثور میاشتې په 21مه واخیستل شي.

د طالبانو د حکومت د ازموینو ملي ادارې اعلان وکړ چې د کانکور ازموینو دوهم پړاو به د غويي په 28مه، دریم پړاو د غبرګولي په 12مه او د متفرقه ازموینې په ګډون څلورم او وروستی پړاو د غبرګولي په 22مه واخیستل شي.

د افغانستان د لوړو او نیمه لوړو زده کړو په موسسو کې د محصلانو د جذب ظرفیت د سږني کال لپاره 111885 تنه دی.

دا په داسې حال کې ده چې د لوړو زده کړو د موسسو دروازې لاهم د نجونو او ښځو پرمخ تړلې دي.

د طالبانو د حکومت د لوړو زده کړو وزارت په 1401 هـ. ل کال کې اعلان وکړ چې نجونې او ښځې تر ثانوي خبرتیا پورې په دولتي او خصوصي پوهنتونونو کې د زده کړو اجازه نه لري.