انصارپرس: د ایران د بهرنیو چارو وزارت ویاند اسماعیل بقايي د دغه هېواد پر وړاندې د اروپايي ټولنې نویو بندیزونو ته په غبرګون کې دا پرېکړه «غیرمنطقي، غیراخلاقي او غیرقانوني» ګڼلې ده.

بقايي پرون په خپله اېکس پاڼه کې لیکلي چې اروپايي ټولنه د دغو بندیزونو په لګولو غواړي ایران مجازات کړي.

نوموړي زیاته کړې: «تاسې غواړئ ایران له دې کبله مجازات کړئ چې د ملګرو ملتونو منشور د 51مې مادې له مخې خپل ذاتي حق د مشروع دفاع لپاره کاروي او د امریکا او اسرائیلي رژیم پر وړاندې د ناقانونه تېري پر ضد مقاومت کوي.»

بقايي ویلي چې په ورته وخت کې همدا «تیري کوونکي نسل‌ وژونکي» د دغو هېوادونو له خوا پر وسلو سمبالېږي او ملاتړ یې کېږي.

دا په داسې حال کې ده چې په بهرنیو چارو او امنیتي سیاست کې د اروپايي ټولنې جګپوړې استازې کایا کالاس ویلي چې د اورپايي ټولنې غړو هېوادونو له بشري حقونو د سرغړونې په تور پر 19 ایراني چارواکو او بنسټونو تازه بندیزونه تصویب کړي دي.