ملګروملتونو خبرداری ورکړی چې په ایران د جګړې شدت په دې هېواد کې میشت په زرهاوو افغان کډوال اړ کړي چې بیرته افغانستان ته راستانه شي.

په افغانستان کې د یو ان ایچ سي ار استازي عرفات جمال په جینوا کې خبریالانو ته ویلي، پر ایران د اسراییلو او امریکا له بریدونو وروسته هر ورځ 1700 افغان کډوال بیرته افغانستان ته ستنیږي.

فرانس پرس خبري اژانس د جمال په حواله وايي،که څه هم دغه کډوال په منظم ډول راستنیږي خو ویره لري.

د هغه په ټکو،هغه څه چې اوس په ایران کې روان دي پایلې به يې افغانستان اغیزمن کړي.

ملګري ملتونه وايي، سږکال 270زره افغان کډوال له ایران او پاکستانه افغانستان ته راستانه شوي دي.

د کډوالو په چارو کې د ملګرو ملتونو عالي کمیشنري (یو ان ایچ سي ار) وايي، د 2026کال له پیل راهیسې تراوسه 110زره افغان کډوال له ایرانه او 160زره له پاکستانه افغانستان ته راغلي دي.

په تیرو دوو کلونو کې څه باندې پنځه میلیونه افغان کډوال له ګاونډیو هېوادونو بیرته افغانستان ته راستانه شوي چې له دې ډلې نژدې دوه میلیونه له ایرانه راغلي دي.

د افغانستان لپاره د ملګرو ملتونو ځانګړي استازي ریچارډ بنیټ تیره اونۍ په خپل راپور کې له ګاونډیو هېوادونو د راستنیو شویو کورنیو په ځانګړو ښځو او نجونو د وضعیت په اړه انديښنه څرګنده کړې وه.